សិក្ខាសាលាផ្សព្វផ្សាយច្បាប់ស្តីពីវិនិយោគនិងបទប្បញ្ញត្តិពាក់ព័ន្ធសម្រាប់អនុគណៈកម្មាធិការវិនិយោគខេត្តសៀមរាប

(ខេត្តសៀមរាប)៖ ក្នុងក្របខ័ណ្ឌនៃកិច្ចសហប្រតិបត្តិការរវាងក្រុមប្រឹក្សាអភិវឌ្ឍន៍កម្ពុជា និងកម្មវិធី Improved Competitiveness of National Enterprise Program របស់ទីភ្នាក់ងារសហប្រតិបត្តិការអន្តរជាតិអាល្លឺម៉ង់ (GIZ-ICONE) សិក្ខាសាលាផ្សព្វផ្សាយច្បាប់ស្តីពីវិនិយោគនិងបទប្បញ្ញត្តិពាក់ព័ន្ធត្រូវបានរៀបចំឡើងនៅមជ្ឈមណ្ឌលសន្និបាតសុខាខេត្តសៀមរាប កាលពីថ្ងៃទី៤ ខែតុលា ឆ្នាំ២០២៣ ក្នុងគោលបំណងផ្សព្វផ្សាយច្បាប់ស្តីពីវិនិយោគនិងបទប្បញ្ញត្តិពាក់ព័ន្ធ, ផ្លាស់ប្តូរឧត្តមានុវត្តន៍សំដៅជំរុញការវិនិយោគ និងបំពាក់បំប៉នសមត្ថភាពរបស់មន្ត្រីនៃអនុគណៈកម្មាធិការវិនិយោគខេត្តសៀមរាប។ កម្មវិធីនេះមានវត្តមានអញ្ជើញចូលរួមពីមន្ត្រីតំណាងក្រុមប្រឹក្សាអភិវឌ្ឍន៍កម្ពុជា អនុគណៈកម្មាធិការវិនិយោគខេត្តសៀមរាប មន្ទីរដែលមានភារកិច្ចពាក់ព័ន្ធចំណុះឲ្យរដ្ឋបាលខេត្ត និងវិស័យឯកជនសរុបចំនួន ៥០រូប។