ដំណើរទស្សនកិច្ចរបស់ឯកឧត្តមឧបនាយករដ្ឋមន្ត្រី នៅមជ្ឈមណ្ឌលបណ្តុះធុរកិច្ចថ្មី GICI ស្ថិតក្នុងទីក្រុង Guangzhou ប្រទេសចិន

សាធារណរដ្ឋប្រជាមានិតចិន៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា នារសៀលថ្ងៃសៅរ៍ ទី២១ ខែតុលា ឆ្នាំ២០២៣នេះ បានបន្តបេសកកម្មក្នុងទីក្រុង Guangzhou ដោយបានចុះទស្សនកិច្ចនៅមជ្ឈមណ្ឌលបណ្តុះធុរកិច្ចថ្មី Guangzhou International Corporate Incubator (GICI) របស់ ក្រុមហ៊ុន Guangzhou Industrial Investment and Capital Operation Holding Group ស្របតាមការស្វាគមន៍យ៉ាងកក់ក្តៅពីលោក Qun Ge នាយករង និងជាប្រធានប្រតិបត្តិក្រុមហ៊ុន។

ក្នុងដំណើរទស្សននេះ ក្រុមហ៊ុនបានធ្វើបទបង្ហាញអំពីការងារមួយចំនួនជូនគណៈប្រតិភូកម្ពុជាដើម្បីបានជ្រាប ហើយក្នុងនោះ ឯកឧត្តមឧបនាយករដ្ឋមន្ត្រី បានជម្រាបជូនក្រុមហ៊ុនផងដែរអំពីការលើកទឹកចិត្តខ្ពស់របស់រាជរដ្ឋាភិបាលកម្ពុជា លើកិច្ចការងារធុរកិច្ចថ្មីនេះ តាមរយៈការបើកឱកាសឱ្យមានកិច្ចសហប្រតិបត្តិការវិនិយោគ។ ឯកឧត្តមឧបនាយករដ្ឋមន្ត្រី បានលើកទឹកចិត្តឱ្យក្រុមហ៊ុនសិក្សាលើការបណ្ដាក់ទុនវិនិយោគធុរកិច្ចរបស់ខ្លួននៅកម្ពុជា ព្រមទាំងអញ្ជើញក្រុមហ៊ុនចុះមកធ្វើទស្សនកិច្ចនៅកម្ពុជាដោយផ្ទាល់ ដើម្បីស្វែងយល់ឱ្យកាន់តែច្បាស់នូវរាល់សក្ដានុពលរបស់កម្ពុជា។