សិក្ខាសាលាស្តីពីការរៀបចំទម្រង់គំរូរបាយការណ៍ និងការកំណត់សូចនាករគោលកម្រិតបច្ចេកទេស សម្រាប់វិធានការគោលនយោបាយនីមួយៗនៃគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ (IDP)

គោលដៅចម្បងនៃសិក្ខាសាលាកម្រិតបច្ចេកទេសនាពេលនេះ គឺដើម្បីផ្សព្វផ្សាយ និងចែករំលែកចំណេះដឹងដល់មន្ត្រីបង្គោលនៃក្រសួងស្ថាប័ន និងរដ្ឋបាលថ្នាក់ក្រោមជាតិពាក់ព័ន្ធ ក្នុងការអនុវត្តគោលនយោបាយ IDP ឲ្យបានយល់កាន់តែលម្អិតអំពីអត្ថន័យ និងធាតុផ្សំសំខាន់ៗនៃការរៀបចំទម្រង់គំរូរបាយការណ៍ (Report Template Format) ដែលជាឧបករណ៍មួយយ៉ាងសំខាន់នៃប្រព័ន្ធតាមដាននិងវាយតម្លៃការអនុវត្តគោលនយោបាយ IDP និងការកំណត់សូចនាករគោល (Milestones Indicators) ដែលជាសូចនាករកម្រិតបច្ចេកទេសសម្រាប់តាមដានវឌ្ឍនភាពនៃការអនុវត្តវិធានការគោលនយោបាយនីមួយៗនៃគោលនយោបាយ IDP។ សារៈសំខាន់នៃការរៀបចំទម្រង់គំរូរបាយការណ៍ គឺដើម្បី (១)ធ្វើការប្រមូលទិន្នន័យនិងព័ត៌មានដែលមានភាពច្បាស់លាស់ សាមញ្ញ និងមានលក្ខណៈជាប្រព័ន្ធ, (២)មានភាពងាយស្រួលក្នុងការពិនិត្យ និងវាយតម្លៃពីវឌ្ឍនភាពនៃការអនុវត្តវិធានការគោលនយោបាយ/ផែនការសកម្មភាពដែលបានដាក់ចេញ, និង(៣)ស្វែងយល់កាន់តែច្បាស់ពីបញ្ហាប្រឈម និងសំណើដំណោះស្រាយនិងទិសដៅការងារបន្តពីក្រសួងស្ថាប័នពាក់ព័ន្ធក្នុងការអនុវត្តគោលនយោបាយ IDP។