កិច្ចប្រជុំអន្តរក្រសួងកម្រិតថ្នាក់ដឹកនាំ ដើម្បីពិនិត្យចុងក្រោយ និងសម្រេចលើសេចក្តីព្រាងក្របខណ្ឌតាមដាន និងវាយតម្លៃការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ (IDP) និងសេចក្តីព្រាងសូចនាករគន្លឹះសម្រាប់ការតាមដាននិងវាយតម្លៃការអនុវត្ត IDP
នាព្រឹកថ្ងៃពុធ ៨កើត ខែភទ្របទ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៦ ខែសីហា ឆ្នាំ២០២០ នៅក្រុមប្រឹក្សាអភិវឌ្ឍន៍កម្ពុជា ឯកឧត្តម ជិន ប៊ុនស៊ាន ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានក្រុមប្រឹក្សាអភិវឌ្ឍន៍កម្ពុជា (ក.អ.ក) បានដឹកនាំកិច្ចប្រជុំអន្តរក្រសួងកម្រិតថ្នាក់ដឹកនាំ ដើម្បីពិនិត្យចុងក្រោយ និងសម្រេចលើសេចក្តីព្រាងក្របខណ្ឌតាមដាន និងវាយតម្លៃការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ (IDP) និងសេចក្តីព្រាងសូចនាករគន្លឹះសម្រាប់ការតាមដាននិងវាយតម្លៃការអនុវត្ត IDP។ កិច្ចប្រជុំនេះ មានការចូលរួមពីឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការ ក.អ.ក, ឯកឧត្តម ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជា, ព្រមទាំងឯកឧត្តម លោកជំទាវ តំណាងក្រសួង ស្ថាប័ន និងរដ្ឋបាលថ្នាក់ក្រោមជាតិពាក់ព័ន្ធ ដែលត្រូវបានចាត់តាំងជាមន្ត្រីបង្គោល និងមន្ត្រីបច្ចេកទេស សរុបចំនួន ១១៩ រូប។
ផ្អែកតាមស្មារតីនៃកិច្ចប្រជុំអន្តរក្រសួងនាថ្ងៃទី២៩ ខែកក្កដា ឆ្នាំ២០២០ ចំពោះការកំណត់សូចនាករគន្លឹះសម្រាប់ការតាមដាននិងវាយតម្លៃការអនុវត្ត IDP អង្គប្រជុំបានអនុញ្ញាតឱ្យមានកិច្ចប្រជុំអន្តរក្រសួងកម្រិតបច្ចេកទេសចំនួន ២លើក សម្រាប់ពិនិត្យពិភាក្សាលើសេចក្ដីព្រាងសូចនាករគន្លឹះកម្រិតយុទ្ធសាស្ត្រ និងកម្រិតវិស័យ នៅថ្ងៃទី៦ និងថ្ងៃទី១២ ខែសីហា ឆ្នាំ២០២០ ដោយមានការចូលរួមពីមន្ត្រីបច្ចេកទេសតំណាងក្រសួង ស្ថាប័នពាក់ព័ន្ធ។ កិច្ចប្រជុំទាំងពីរលើកនេះ បានប្រព្រឹត្តទៅយ៉ាងរលូន និងមានការចូលរួមពិភាក្សាយ៉ាងផុសផុល ដោយក្នុងនោះ តំណាងក្រសួងស្ថាប័នពាក់ព័ន្ធបានផ្ដល់ធាតុចូលជាច្រើនលើសេចក្ដីព្រាងសូចនាករដែលបានរៀបចំឡើងដោយ ក.អ.ក ដូចជាការស្នើសុំបន្ថែម, លុបចោល និងកែសម្រួលសូចនាករគន្លឹះមួយចំនួន សំដៅធ្វើយ៉ាងណាឱ្យសូចនាករទាំងនោះមានលក្ខណៈប្រាកដនិយម សមស្រប និងមានប្រភពទិន្នន័យច្បាស់លាស់។
ជារួម អង្គប្រជុំនាថ្ងៃនេះបានសម្រេចលទ្ធផលដូចខាងក្រោម៖
(១) ឯកភាពលើសេចក្តីព្រាងក្របខណ្ឌតាមដាន និងវាយតម្លៃការអនុវត្ត IDP និងសេចក្តីព្រាងសូចនាករគន្លឹះកម្រិតយុទ្ធសាស្ត្រ និងកម្រិតវិស័យ
(២) ឯកភាពឱ្យ ក.អ.ក រៀបចំសិក្ខាសាលាកម្រិតបចេ្ចកទេសមួយ ដើម្បីផ្សព្វផ្សាយអំពីទម្រង់គំរូរបាយការណ៍ និងការកំណត់សូចនាករគោលកម្រិតបច្ចេកទេស សម្រាប់វិធានការគោលនយោបាយនីមួយៗរបស់ IDP ដោយមានការចូលរួមពីក្រសួង ស្ថាប័ន និងរដ្ឋបាលថ្នាក់ក្រោមជាតិពាក់ព័ន្ធ នៅក្នុងសប្ដាហ៍ទី២ នៃខែកញ្ញា ឆ្នាំ២០២០ខាងមុខ
(៣) ក.អ.ក នឹងធ្វើការបូកសរុបអនុសាសន៍ណែនាំបន្ថែមលើសេចក្ដីព្រាងឯកសារទាំងពីរដែលបានទទួលការឯកភាពក្នុងកិច្ចប្រជុំអន្តរក្រសួងនេះ ដើម្បីស្នើដាក់ជូនកិច្ចប្រជុំគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុនាពេលឆាប់ៗខាងមុខ មុននឹងបន្តដាក់ជូនរាជរដ្ឋាភិបាលពិនិត្យ និងសម្រេចដាក់ឱ្យប្រើប្រាស់ជាចុងក្រោយ។